Tilskot til breibandutbygging

Vestland fylkeskommune lyser ut 40 millionar kroner til utbygging av breiband i fylket. Kommunane kan søkje om tilskot til område der det ikkje er kommersielt lønsamt å bygge ut. Ordninga støttar utbygging i område som manglar tilbod om breiband med 100 Mbit/s eller høgare. Prosjekt som mottar tilskot skal etablere eit reelt breibandstilbod til alle hushald og verksemder innanfor det geografiske området det er søkt om støtte til, med minimum 1 Gbit/s kapasitet etter utbygging. Ved prioritering mellom søknadar legg fylkeskommunen vekt på tal hustandar og bedrifter som får betring av breibandtilbodet, kostnadseffektiv utbygging i det enkelte prosjektet, og lokal medfinansiering. Støttemidlar skal ikkje brukast til å etablere tilbod til fritidsbustader. Største delen av midlane kjem frå ei rammeløyving frå Digitaliserings- og forvaltningsdepartementet, og prosjekt som får tilskot skal vera gjennomført innan 1. juli 2027.