Tilskot til verdsarv

Møre og Romsdal fylkeskommune forvaltar tilskot til Vestnorsk fjordlandskap i delområde Geirangerfjorden i kommunane Fjord og Stranda. Tiltak og prosjekt som får støtte skal bidra til å bevare dei unike verdiane i natur- og kulturmiljøet. Formålet med ordninga er å bidra til at verdsarvområda blir utvikla som fyrtårn for den beste praksisen innan natur- og kulturmiljøforvaltning når det gjeld tilstand, forvaltning og formelt vern. Tilskotet skal gå til tiltak og prosjekt i verdsarvområdet Geirangerfjord i Fjord og Stranda kommunar som bidrar til å oppfylle formålet med tilskotsordninga. Eksempel på slike tiltak og prosjekt er vedlikehald og istandsetting av verneverdige bygg og anlegg, skjøtsel av kulturlandskap, skilting, formidling, kurs og forsking, og brannsikring av verneverdige bygningar. Fylkeskommunen bestemmer om du får støtte, og kor mykje du får, basert på om tiltaket ditt bidreg til å oppnå måla for støtteordninga. Det blir lagt vekt på prioriteringane i forvaltningsplanen for verdsarvområde, kapasitet, kompetanse og anna finansiering til å gjennomføre tiltaket, tiltak som bevarer dei verdiane som verdsarvstatusen er grunnlagt på, tiltak som styrkar forvaltninga av verdsarven, tiltak som stimulerer lokalt engasjement og eigarskap, og forsking og ny kunnskap. Som hovudregel skal ikkje tilskotet overstige 50–70 prosent av totalkostnaden i det enkelte prosjektet. Unntak frå dette må vurderast i lys av formålet med tiltaket, kulturminnet/kulturmiljøet sin verdi, bruken av kulturminnet/kulturmiljøet, og om det er eit særleg stort vedlikehaldsansvar i forhold til bruken.